Hebrews 3
A Yesu-viyi Zhin Shekwoyi Nyakun Nu
1Ntu deye ɓo, ema zaje Gyi-gyi-yi, yi zhin Shekwoyi aza kni-kni yi nu. Fye ku efya bugba ga Yesu na tnu nwoi nyi. Eyi pirist dnagmanyi gaiciya ga nya.2Yesu ɓei zhin gaiciya n Shekwoyi aba ngye shi Musa ɓei zhin nyi. 3Ama Yesu ɓo du Musa n mwamwa. Ko wu ngye ozanu n wa mi nyakun wo du nyakun n mwa-mwa. 4Gama yakun doho-dohoi oza nu na mi, ama Shekwoyi nu na mi anya vinya.
5Musa ɓo zhin tnu-tnu n Shekwoyi azai sosai. Ama wo ɓei bwa fyenu nu zhin. Deye kwo ɓei zhin dogbe nu n anya yi n ɓa ɓelo n abye nyi. 6Ama Yesu ɓei zhin gaiciya tu Shekwoyi puwa ntu ge wo zhin nugun nu. Yi zhin wo azanu n ya mi dna gaiciya, har nyalo-nyalo.
7Ntu deye ɓo, she Zafun Gyi-gyi-yi ku da, “Kna tnubua n mi ɓeda n naiye, 8to ha kpe bugba akala ngye a Israila yi m. Pa a Israila yi ɓo dna n jaraba sa n zhabui. Fye to kpe bugba a kala ngye shi fye azakwoyi ɓei zhin fi n zhabui nyi m. 9Ofya dada ɓei tu mi mwi ɓa mwimi gye, ɓa gye a ɓo wowoi aye shinyi, ama ɓa dudu ɓa kpa kala. 10Ntu deye ɓo ma gyi minagyi n ɓai. Ma ci ge ɓa zhin abugba nukwoyi danu. Balle ma ɓata kpe mi ‘zokwo ye lon.
11“ ‘Ntu cenu ma si nya-si ge, Ɓata lo emi sun-sun m.’ ”
Abugba Kala Kpey i
12Omi-zaje fye zhin peceiye, n na ta bwa bugba nukwoyi da n fye m. Ko ɓa zhin fya ya gaiciya. 13Fye zhin aje gargadi cici, esa ye nyi, to zaho wa kpe a kala m, woi zhin laifi cici m. Ko ɓa ɓe fye n fiyi n bugba wun yi n jesun. 14Yi kuze agado gyiyi n Kristi yi, yi zhin wo aɓi ɓehin-hin nya nu, N ya mi zhi dna gaiciya ga har nyalo-nyalo.15Gama wa gna, “N naiye nha wo mi ɓeda, to ha kpe bugba a kala n gye aza n sapayi m.”
16A nyikadonu ɓei wo to ɓa zhin biyaya ma? O ɓa nu n Musa ɓei kun ɓa n Masar kni. 17Shekwoyi ɓei gyi minagyi na nyikayi nu har aye shinyi a? Wo ɓei gyi minagyi nazai nu n ɓa ɓei zhin laifi fi n zhabui nyi. 18Shekwoyi ɓei si nyasi ga nyika nu ge ɓa ta lo wo sun-sun ma? Ɓanu bwa sun njesun. 19Ntu lonu ɓato ɓei lo asun-sun ba m, (wato a Israila yi) ntu n ɓa tna gaiciya ga ɓo.
Copyright information for
GbrGAW